അരീക്കോട്: അരീക്കോട് ആരോഗ്യ കൂട്ടായ്മയുടെ നേതൃത്വത്തിൽ കഴിഞ്ഞ 11 വർഷമായി അരീക്കോട് പഞ്ചായത്ത് സ്റ്റേഡിയത്തിൽ നടന്നുവരുന്ന വ്യായാമപരിശീലനം നവംബർ 15 ഞായറാഴ്ച മുതൽ പുനരാരംഭിക്കും. മഴക്കാല ഇടവേളക്ക് ശേഷം രാവിലെ 6.45-ന് അരീക്കോട് പഞ്ചായത്ത് സ്റ്റേഡിയത്തിൽ പരിശീലനം തുടങ്ങാൻ കഴിഞ്ഞ ദിവസം ചേർന്ന ആരോഗ്യ കൂട്ടായ്മയുടെ രക്ഷാധികാരി – എക്സിക്യൂട്ടീവ് കമ്മിറ്റി യോഗമാണ് തീരുമാനിച്ചത്.

പുനരാരംഭിക്കുന്ന ആദ്യ ദിനത്തിൽ വ്യായാമത്തിന് ശേഷം, 55ഓളം രാഷ്ട്രങ്ങൾ സന്ദർശിച്ച യാത്രാവിവരണക്കാരൻ നൗഷാദ് അരീക്കോട് “യാത്രകളും ആരോഗ്യവും” എന്ന വിഷയത്തെ ആസ്പദമാക്കി ക്ലാസ്സെടുക്കും.

യോഗത്തിൽ ആരോഗ്യ കൂട്ടായ്മ രക്ഷാധികാരി കണ്ണഞ്ചേരി അബ്ദുൽ ഹമീദ് സ്വാഗതവും കടൂരൻ കുഞ്ഞാപ്പു അധ്യക്ഷതയും വഹിച്ചു. ഭാരവാഹികളായ തൊടുവിൽ സലീം, എ. സമദ് മാസ്റ്റർ, അബ്ദുൽ മജീദ് സി.കെ, ചീമാടൻ ജാഫർ, ജാഫർ മുണ്ടമ്പ്ര, അഡ്വ: എം.ടി സഫീർ തുടങ്ങിയവർ സംസാരിച്ചു. ചീമാടൻ യൂസുഫ് നന്ദി പറഞ്ഞു. കൂടുതൽ വിവരങ്ങൾക്കും പുതിയതായി പങ്കാളികളാകാൻ താല്പര്യമുള്ളവർക്കും പ്രസ്തുത സമയത്ത് സ്റ്റേഡിയത്തിൽ എത്തിച്ചേരാവുന്നതാണ്.

കീഴുപറമ്പ്: കീഴുപറമ്പ് പഞ്ചായത്തിൽ വാട്ടർ അതോറിറ്റിയുടെ ജലവിതരണം നിരന്തരം തടസ്സപ്പെടുന്നതിനെതിരെ മുഖ്യമന്ത്രി വി.ഡി സതീശന് പരാതി നൽകി. കീഴുപറമ്പ് സ്വദേശിയായ കെ.എം സലീമാണ് ജലസേചന മന്ത്രി, ജല അതോറിറ്റി എം.ഡി എന്നിവർക്ക് പുറമെ മുഖ്യമന്ത്രിക്കും അടിയന്തര ഇടപെടൽ ആവശ്യപ്പെട്ട് ഇമെയിൽ വഴി പരാതി നൽകിയത്.

നാല്പതു വർഷത്തോളം പഴക്കമുള്ള എസി (AC) പൈപ്പുകൾ ജലത്തിന്റെ മർദ്ദം താങ്ങാനാവാതെ പൊട്ടുന്നതാണ് ഈ മേഖലയിൽ നിരന്തരം ജലവിതരണം മുടങ്ങാൻ കാരണമെന്ന് പരാതിയിൽ ചൂണ്ടിക്കാണിക്കുന്നു. സ്വന്തമായി കിണറോ മറ്റ് കുടിവെള്ള സ്രോതസ്സുകളോ ഇല്ലാത്ത സാധാരണക്കാരായ ഭൂരിഭാഗം ജനങ്ങളും ഈ പദ്ധതിയെയാണ് ആശ്രയിക്കുന്നത്. മുൻകൂട്ടി യാതൊരുവിധ മുന്നറിയിപ്പും നൽകാതെയാണ് പൈപ്പ്‌ലൈൻ തകരാറുകളുടെ പേരിൽ ജലവിതരണം തടസ്സപ്പെടുത്തുന്നത്. ഇത് കാരണം കുടിവെള്ളം ഉൾപ്പെടെയുള്ള പ്രാഥമിക ആവശ്യങ്ങൾക്കുള്ള വെള്ളം പോലും ശേഖരിച്ചു വെക്കാൻ പ്രദേശവാസികൾക്ക് സാധിക്കുന്നില്ല.

വൈദ്യുതി വകുപ്പ് ചെയ്യുന്നത് പോലെ, പൈപ്പ്‌ലൈൻ തകരാറുകൾ മൂലമോ മറ്റ് കാരണങ്ങളാലോ ജലവിതരണം തടസ്സപ്പെടുമ്പോൾ ആ വിവരം ഉപഭോക്താക്കളെ മുൻകൂട്ടി അറിയിക്കാനുള്ള സംവിധാനം ഉണ്ടാക്കണമെന്നും ഇതിനായി ബന്ധപ്പെട്ട വകുപ്പുകൾക്ക് അടിയന്തര നിർദ്ദേശം നൽകണമെന്നും സലീം പരാതിയിലൂടെ ആവശ്യപ്പെട്ടു.

അരീക്കോട്: അരീക്കോട് ഗവണ്‍മെന്റ് ഐ.ടി.ഐ.യില്‍ ഐ.എം.സി.യുടെ ആഭിമുഖ്യത്തില്‍ നടത്തുന്ന തൊഴിലധിഷ്ഠിത കോഴ്സുകളിലേക്ക് പ്രവേശനം ആരംഭിച്ചു. എ.ഐ. ഇന്റഗ്രേറ്റഡ് എയര്‍ കാര്‍ഗോ ഷിപ്പിങ് ആന്‍ഡ് ലോജിസ്റ്റിക്‌സ് മാനേജ്‌മെന്റ്, ഫിനാന്‍ഷ്യല്‍ അക്കൗണ്ടിങ് ആന്‍ഡ് ടാക്‌സേഷന്‍ എന്നീ കോഴ്സുകളിലേക്കാണ് അപേക്ഷ ക്ഷണിച്ചിട്ടുള്ളത്.

എസ്.എസ്.എല്‍.സി, പ്ലസ് ടു, ഡിഗ്രി എന്നിവയാണ് കോഴ്സുകളുടെ അടിസ്ഥാന യോഗ്യത. പഠനത്തോടൊപ്പം പ്ലേസ്മെന്റ് പിന്തുണയും ഇന്റേണ്‍ഷിപ്പും ലഭ്യമാക്കുന്ന ഈ കോഴ്സുകളില്‍ വിദ്യാര്‍ഥികള്‍ക്കായി ഇംഗ്ലീഷ് ഭാഷാ പരിജ്ഞാനം, വ്യക്തിത്വ വികസനം എന്നിവയില്‍ പ്രത്യേക പരിശീലനവും നല്‍കും.

കുനിയിൽ: അൽ അൻവാർ സ്കൂളിൽ വിദ്യാർത്ഥികൾക്കായി നടപ്പിലാക്കിയ ‘സൗഹൃദത്തണൽ’ പദ്ധതി ഉദ്ഘാടനം ചെയ്തു. കുട്ടികൾക്ക് വിശ്രമിക്കാനും സൗഹൃദം പങ്കുവെച്ച് സന്തോഷത്തോടെ സമയം ചെലവഴിക്കാനുമായി പദ്ധതിയുടെ ഭാഗമായി നിർമ്മിച്ച ഇരിപ്പിടത്തിന്റെ ഉദ്ഘാടനം ഗ്രാമപഞ്ചായത്ത് പ്രസിഡന്റ് അബൂബക്കർ മാസ്റ്റർ കാരങ്ങാടൻ നിർവഹിച്ചു. സ്കൂൾ പ്രസിഡന്റ് ഗഫൂർ കുറുമാടൻ ചടങ്ങിൽ അധ്യക്ഷത വഹിച്ചു.

വാർഡ് മെമ്പർ പ്രിൻസ്, സ്കൂൾ മാനേജർ മുഹമ്മദലി മാസ്റ്റർ, ട്രഷറർ ഷബീർ ബാബു, അബ്ദുറസാഖ്, പി.ടി.എ പ്രസിഡന്റ് അസൈൻ വി.പി, എം.ടി.എ പ്രസിഡന്റ് സഹ്‌ല കെ.സി, പി.ടി.എ മെമ്പർ ഷാഫിന, പ്രധാനാധ്യാപകരായ യൂസുഫ് കെ, ചന്ദ്രദാസ്, സ്റ്റാഫ് സെക്രട്ടറി അബ്ദുൽ ലത്തീഫ്, തസ്‌ലീന എം.കെ എന്നിവർ സംസാരിച്ചു. റുഖിയ എ.പി, റസീന ടി.പി, ഫഹ്മിന ടി, സമീറ കെ, ശിഫ കെ.ടി, ഹസ്ന എം.ടി, ഫസൽ, അമീർ സി.പി, മുഹമ്മദ് ആസിം തുടങ്ങിയവർ പരിപാടിയിൽ പങ്കെടുത്തു.

അരീക്കോട്: പ്രദേശത്തെ കർഷകർക്ക് കാലങ്ങളായി വലിയ തലവേദന സൃഷ്ടിച്ചിരുന്ന കാട്ടുപന്നിയെ വെടിവെച്ചു കൊന്നു. കൃഷിയിടങ്ങളിൽ നിരന്തരം നാശനഷ്ടങ്ങൾ വരുത്തിയിരുന്ന കാട്ടുപന്നിയുടെ ശല്യം കാരണം നിരവധി കർഷകർക്ക് വലിയ സാമ്പത്തിക നഷ്ടം സംഭവിച്ചിരുന്നു.

സലാം, അസ്‌കർ കരീക്കുന്നൻ എന്നിവർ ചേർന്നാണ് കൃഷിയിടത്തിൽ ഇറങ്ങിയ കാട്ടുപന്നിയെ വെടിവെച്ചത്. ഏറെക്കാലമായി കാട്ടുപന്നിയുടെ ശല്യം മൂലം ദുരിതത്തിലായിരുന്ന മൈത്രയിലെ കർഷകർക്ക് ഈ നടപടി വലിയ ആശ്വാസമായിരിക്കുകയാണ്.

സംസ്ഥാനത്തെ ഒ.ബി.സി, ഒ.ഇ.സി വിഭാഗങ്ങളിലെ വിദ്യാര്‍ഥികള്‍ക്കും ഉദ്യോഗാര്‍ഥികള്‍ക്കും വിവിധ മത്സര പരീക്ഷാ പരിശീലനത്തിനായി ധനസഹായം നല്‍കുന്ന എംപ്ലോയബിലിറ്റി എന്‍ഹാന്‍സ്‌മെന്റ് പ്രോഗ്രാം എന്ന പദ്ധതിയിലേക്ക് പിന്നാക്ക വിഭാഗ വികസന വകുപ്പ് അപേക്ഷ ക്ഷണിച്ചു. മെഡിക്കല്‍, എന്‍ജിനീയറിങ് എന്‍ട്രന്‍സ്, സിവില്‍ സര്‍വീസ്, ബാങ്കിങ് സര്‍വ്വീസ്, ഗേറ്റ്, മാറ്റ്, യു.ജി.സി-നെറ്റ്/ജെ.ആര്‍.എഫ്. തുടങ്ങിയ പരീക്ഷകള്‍ക്കാണ് ഈ ധനസഹായം ലഭിക്കുന്നത്. www.egrantz.kerala.gov.in എന്ന സ്‌കോളര്‍ഷിപ്പ് പോര്‍ട്ടല്‍ മുഖേനയാണ് ഓണ്‍ലൈനായി അപേക്ഷിക്കേണ്ടത്. മെഡിക്കല്‍/എന്‍ജിനീയറിങ് എന്‍ട്രന്‍സ്, ബാങ്കിംഗ് സര്‍വ്വീസ് എന്നിവയ്ക്ക് രണ്ട് ലക്ഷം രൂപയും സിവില്‍ സര്‍വ്വീസിന് നാലര ലക്ഷം രൂപയും ഗേറ്റ്, മാറ്റ്, യു.ജി.സി-നെറ്റ്/ജെ.ആര്‍.എഫ് എന്നിവയ്ക്ക് രണ്ടര ലക്ഷം രൂപയുമാണ് കുടുംബ വാര്‍ഷിക വരുമാന പരിധി. അപേക്ഷിക്കുന്നതിനുള്ള അവസാന തീയതി നവംബര്‍ 20. പദ്ധതി സംബന്ധിച്ച കൂടുതല്‍ വിവരങ്ങള്‍ അടങ്ങിയ വിജ്ഞാപനം ഇ-ഗ്രാന്റ്‌സ് സൈറ്റില്‍ ലഭ്യമാണ്. ഫോണ്‍-0492 2222335. ഇമെയില്‍- [email protected]

കീഴുപറമ്പ്: വിവിധ കാരണങ്ങളാൽ പഠനം മുടങ്ങിയവർക്ക് തുടർപഠനത്തിന് അവസരമൊരുക്കുന്നതിനായി കീഴുപറമ്പ് ഗ്രാമപഞ്ചായത്തിന്റെ നേതൃത്വത്തിൽ സാക്ഷരതാ മിഷന്റെ തുല്യതാ കോഴ്‌സുകളിലേക്ക് പ്രവേശനം ആരംഭിച്ചു. പത്താംതരം, ഹയർസെക്കൻഡറി തുല്യതാ കോഴ്‌സുകളിലേക്കാണ് അപേക്ഷ ക്ഷണിച്ചിരിക്കുന്നത്. കോഴ്‌സ് വിജയകരമായി പൂർത്തിയാക്കുന്നവർക്ക് പി.എസ്.സി അംഗീകാരമുള്ള സർക്കാർ സർട്ടിഫിക്കറ്റ് ലഭിക്കും. ഇത് തുടർവിദ്യാഭ്യാസത്തിനും തൊഴിൽ അവസരങ്ങൾക്കും പ്രയോജനപ്പെടും.

പഠിതാക്കൾക്കായി മികച്ച പഠന സൗകര്യങ്ങളാണ് പഞ്ചായത്തിൽ ഒരുക്കിയിട്ടുള്ളത്. എസ്.സി, എസ്.ടി വിഭാഗത്തിൽപ്പെട്ടവർക്ക് നിബന്ധനകൾക്ക് വിധേയമായി ഫീസ് ഇളവും മറ്റ് ആനുകൂല്യങ്ങളും ലഭിക്കും. കോഴ്‌സിൽ ചേരാൻ താല്പര്യമുള്ളവർ 9645296362 എന്ന ഫോൺ നമ്പറിൽ ബന്ധപ്പെടണമെന്ന് അധികൃതർ അറിയിച്ചു.