അരീക്കോട്: സി.ഐ.ടി.യു സ്ഥാപക ദിനത്തോട് അനുബന്ധിച്ച് കെ.സി.ഇ.യു അരീക്കോട് യൂണിറ്റ് കമ്മറ്റി അരീക്കോട് സർവീസ് സഹകരണ ബാങ്കിന് മുന്നിൽ പതാക ഉയർത്തി ആചരിച്ചു. സി.ഐ.ടി.യു ഏരിയാ സെക്രട്ടറി എം.ടി മുസ്തഫ ഉദ്ഘാടനം ചെയ്തു. പി.കെ. സുഭാഷ് സ്വാഗതം പറഞ്ഞു. ഇ. ശിവദാസൻ അധ്യക്ഷത വഹിച്ചു. എം. വാസുദേവൻ അഭിവാദ്യം അർപ്പിച്ചു. കെ.സലീം നന്ദി പറഞ്ഞു.

തെരട്ടമ്മൽ: വിവിധ മത്സര പരീക്ഷൾക്ക് ഉദ്യോഗാർഥികളെ പ്രാപ്തമാക്കുക എന്ന ലക്ഷ്യത്തോടെ തെരട്ടമ്മൽ വാർഡിൽ ആരംഭിച്ച പിഎസ്‌സി കോച്ചിംഗിന് തുടക്കമായി. പിഎസ്‌സി വഴി ജോലിയിൽ പ്രവേശിച്ച തെരട്ടമ്മലിലെ ഒരു കൂട്ടം ചെറുപ്പക്കാരുടെ സംഘാടനത്തിൽ ആരംഭിച്ച കോച്ചിംഗ് ക്യാമ്പിന്റെ ഉദ്ഘാടന കർമ്മം വാർഡ് മെമ്പർ ജമീല നജീബ് നിർവ്വഹിച്ചു. അബ്ദുൽ റസാഖ് അധ്യക്ഷത വഹിച്ച പരിപാടിയിൽ ഷാഹിൽ ചെമ്പകത്ത് സ്വാഗതം പറഞ്ഞു. കോച്ചിംഗ് ക്യാമ്പിന്റെ പ്രധാന സംഘാടകരിൽ ഒരാളായ ഡാനിഷ് കരുവാടന്റെ നേതൃത്വത്തിൽ നടന്ന ക്ലാസ്സിൽ പിഎസ്‌സി, യുപിഎസ്‌സി തുടങ്ങിയ വിവിധ മത്സര പരീക്ഷകളുടെ സാധ്യതകളെ കുറിച്ച് കുട്ടികളെ ബോധവൽക്കരിച്ചു. ഊർങ്ങാട്ടിരി ഗ്രാമ പഞ്ചായത്ത് മുൻ പ്രസിഡന്റ് എൻ കെ ഷൗക്കത്തലി ആശംസയർപ്പിച്ച പരിപാടിക്ക് ഷബീർ ചെമ്പകത്ത് നന്ദിയും പറഞ്ഞു.

കീഴുപറമ്പ്: കീഴുപറമ്പ് ഗ്രാമ പഞ്ചായത്തിൽ വർഷകാല മുന്നൊരുക്കത്തിൻ്റെ ഭാഗമായി ദുരന്ത നിവാരണവുമായി ബന്ധപ്പെട്ട് സ്വീകരിക്കേണ്ട പ്രവർത്തികൾ വിലയിരുത്തുന്നതിന് ഗ്രാമപഞ്ചായത്ത് പ്രസിഡൻ്റ് വി.പി സഫിയയുടെ അദ്ധ്യക്ഷതയിൽ പഞ്ചായത്ത് ഹാളിൽ യോഗം ചേർന്നു. ചടങ്ങിൽ ഗ്രാമപഞ്ചായത്ത് വൈസ് പ്രസിഡൻ്റ് പി.പി.എ റഹ്മാൻ, വികസന സ്റ്റാൻ്റിംഗ് കമ്മിറ്റി ചെയർപേഴ്സൺ സി.കെ സഹ് ല മുനീർ, വാർഡ് മെമ്പർ തസ് ലീന ഷബീർ, വില്ലേജ് ഓഫീസർ അബ്ബാസ്, വിവിധ വകുപ്പ് മേധാവികൾ, ട്രോമ കെയർ വളണ്ടിയേഴ്സ് തുടങ്ങിയവർ സംബന്ധിച്ചു. ഓരോ വകുപ്പുകളും അടിയന്തരമായി ചെയ്യേണ്ട കാര്യങ്ങളും മുൻകരുതലുകളും യോഗം ചർച്ച ചെയ്തു വേണ്ട നടപടികൾ കൈക്കൊള്ളാൻ തീരുമാനിച്ചു.

അരീക്കോട്: അരീക്കോട് താലൂക്ക് ആശുപത്രിയിൽ അത്യാഹിത വിഭാഗം തുടങ്ങാത്തതിൽ ആരോഗ്യവകുപ്പിനും സൂപ്രണ്ടിനും എതിരെ സേവ് അരീക്കോട് താലൂക്ക് ആശുപത്രി ഫോറം ഹൈക്കോടതിയിൽ ഫയൽ ചെയ്ത കേസിൽ കോടതി സർക്കാറിനോട് വിശദീകരണം തേടി.

അരീക്കോട് താലൂക്ക് ആശുപത്രിയിൽ അത്യാഹിത വിഭാഗം തുടങ്ങുന്നതിൽ ഗുരുതര വീഴ്ച വരുത്തിയ ഉദ്യോഗസ്ഥരെ പ്രതിചേർത്താണ് സേവ് അരീക്കോട് താലൂക്ക് ആശുപത്രി ഫോറം ചെയർമാൻ കെ.എം സലിം പത്തനാപുരം കേസ് ഫയൽ ചെയ്തത്. താലൂക്ക് ആശുപത്രിയിൽ അത്യാഹിത വിഭാഗം തുടങ്ങുന്നതിന് ആവശ്യമായ സൗകര്യവും മതിയായ ജീവനക്കാരും ഉണ്ടെന്നിരിക്കെ നിസ്സാര കാരണങ്ങൾ ഉയർത്തി സർക്കാർ ഉത്തരവുകൾ അട്ടിമറിക്കാനുള്ള ഉദ്യോഗസ്ഥ ശ്രമത്തിനെതിരെയാണ് പരാതി.

(WPC 19354/2024) എന്ന നമ്പറിൽ ഫയൽ ചെയ്ത കേസിൽ ഹൈക്കോടതി സിംഗിൾ ബെഞ്ചിൽ ജസ്റ്റിസ് ടി.ആർ രവി ആദ്യവാദം കേട്ടു. സംഭവത്തിൽ പത്ത് ദിവസത്തിനുള്ളിൽ സർക്കാരിനോട് വിശദീകരണം നൽകാൻ ആവശ്യപ്പെട്ട കോടതി കേസ് ജൂൺ 11 ലേക്ക് മാറ്റിവച്ചു. താലൂക്ക് ആശുപത്രി സൂപ്രണ്ട്, ജില്ലാ മെഡിക്കൽ ഓഫീസർ, ആരോഗ്യവകുപ്പ് സെക്രട്ടറി എന്നിവരെ എതിർകക്ഷികളായി ചേർത്തുകൊണ്ടാണ് കേസ് ഫയൽ ചെയ്തിരിക്കുന്നത്. സേവ് അരീക്കോട് താലൂക്ക് ആശുപത്രി ഫോറത്തിനായി അഡ്വ. ഹാരിസ് മൂസ, അഡ്വ. എം.ബി സൂരി എന്നിവർ ഹാജരായി.

കീഴുപറമ്പ്: കീഴുപറമ്പ് മഴക്കാല പൂർവ ശുചീകരണ പരിപാടിയുടെ ഭാഗമായി നടക്കുന്ന ‘മുന്നൊരുക്കം’ കാമ്പയിനിൽ തൊഴിലുറപ്പ് തൊഴിലാളികൾക്കുള്ള പ്രതിരോധ മരുന്ന് വിതരണോദ്ഘാടനം പഞ്ചായത്ത് പ്രസിഡൻ്റ് വി.പി സഫിയ നിർവഹിച്ചു. ചടങ്ങിൽ ഗ്രാമപഞ്ചായത്ത് വൈസ് പ്രസിഡൻ്റ് പി.പി.എ റഹ്മാൻ അദ്ധ്യക്ഷത വഹിച്ചു. ജൂനിയർ ഹെൽത്ത് ഇൻസ്പെക്ടർ നാസർ ക്ലാസെടുത്തു. ഗ്രാമ പഞ്ചായത്ത് വികസന സ്റ്റാൻ്റിംഗ് കമ്മിറ്റി ചെയർപേഴ്സൺ സി.കെ സഹ് ല മുനീർ വാർഡ് മെമ്പർമാരായ എം.പി അബ്ദുറഹ്മാൻ, തസ് ലീന ഷബീർ, എം.ജി.എൻ.ആർ.ജി.എസ് എ.ഇ ജസീം, തൊഴിലുറപ്പ് തൊഴിലാളികൾ തുടങ്ങിയവർ സംബന്ധിച്ചു.