അരീക്കോട് : എഴുപത്തിയഞ്ച് വർഷം പൂർത്തിയാക്കുന്ന കൊഴക്കോട്ടൂർ എ.യു.പി സ്കൂളിന്റെ പ്ലാറ്റിനം ജൂബിലി ആഘോഷങ്ങളുടെ ഭാഗമായി ഈ വർഷം നടപ്പിലാക്കുന്ന എഴുപത്തിയഞ്ച് കർമ്മ പരിപാടികൾ പ്രഖ്യാപിച്ചു. മുഴുവൻ രക്ഷിതാക്കൾക്കും ഡിജിറ്റൽ സാക്ഷരത ഉറപ്പാക്കുക, സ്കൂളിലെ മുഴുവൻ ക്ലാസ്സ് റൂമുകളും മൾട്ടിമീഡിയ സംവിധാനത്തിലേക്ക് മാറ്റുക, കൂടാതെ ആധുനിക സൗകര്യങ്ങളോടു കൂടിയ കമ്പ്യൂട്ടർ, ഗണിത ലാബുകൾ സജ്ജമാക്കുക തുടങ്ങിയ ശ്രദ്ധേയമായ പദ്ധതികളാണ് ഈ അധ്യയന വർഷം നടപ്പിലാക്കാൻ ലക്ഷ്യമിടുന്നത്.
സ്കൂളിൽ നടന്ന പി.ടി.എ ജനറൽ ബോഡി യോഗത്തിൽ വെച്ച് പി.ടി.എ പ്രസിഡന്റും മലപ്പുറം ജില്ലാ പഞ്ചായത്ത് അംഗവുമായ കെ.ടി. അഷ്റഫ് ഈ പ്രവർത്തന പദ്ധതികളുടെ ഔദ്യോഗിക പ്രകാശനം നിർവഹിച്ചു. ചടങ്ങിൽ വാർഡ് മെമ്പർ എ.ഡബ്ല്യു. അബ്ദുറഹ്മാൻ ആശംസകൾ അർപ്പിച്ച് സംസാരിച്ചു. എം.ടി.എ പ്രസിഡൻ്റ് ലത, സ്കൂൾ പ്രധാന അധ്യാപിക എ.കെ. സന്ധ്യ, സ്റ്റാഫ് സെക്രട്ടറി എ. ശ്രീകല തുടങ്ങിയവരും പ്രസ്തുത യോഗത്തിൽ പങ്കെടുത്ത് സംസാരിച്ചു.
Comments are closed.