സംസ്ഥാന സാക്ഷരതാമിഷൻ നടത്തുന്ന ഹയർസെക്കൻഡറി, പത്താം തരം തുല്യതാ കോഴ്സുകളിലേക്ക് 50 രൂപ പിഴയോടെ ഒക്ടോബർ 24 വരെ അപേക്ഷിക്കാം. ഹയർസെക്കൻഡറി തുല്യതയ്ക്ക് പത്താം ക്ലാസ് ജയിച്ചവർക്കും മുൻപ് ഹയർസെക്കൻഡറി പരാജയപ്പെട്ടവർക്കും അപേക്ഷിക്കാം. കുറഞ്ഞ പ്രായപരിധി 22 വയസ്സാണ്. പത്താം തരം തുല്യതയ്ക്ക് ഏഴാം ക്ലാസ് ജയിച്ചവർക്കും 10-ൽ പരാജയപ്പെട്ടവർക്കും 7-നും 10-നും ഇടയിൽ പഠനം ഉപേക്ഷിച്ചവർക്കും ചേരാം.17 വയസ്സ് പൂർത്തിയായിരിക്കണം. ഉയർന്ന പ്രായപരിധിയില്ല. നാല്, ഏഴ് ക്ലാസുകളിലെ തുല്യതാ കോഴ്സുകളിലേക്കും അർഹരായവർക്ക് പ്രവേശനം നേടാം.
ഹയർസെക്കൻഡറി തുല്യതയ്ക്ക് 2600 രൂപയും (രജിസ്ട്രേഷൻ 300 രൂപ, കോഴ്സ് ഫീസ് 2300 രൂപ) പത്താം തരത്തിന് 1950 രൂപയുമാണ് (രജിസ്ട്രേഷൻ 100 രൂപ, കോഴ്സ് ഫീസ് 1850 രൂപ) ഫീസ്. പട്ടികജാതി/പട്ടികവർഗ്ഗ വിഭാഗങ്ങൾക്കും ഭിന്നശേഷിക്കാർക്കും രജിസ്ട്രേഷൻ ഫീസ് മാത്രം നൽകിയാൽ മതിയാകും. തദ്ദേശ സ്വയംഭരണ സ്ഥാപനങ്ങളുടെ പദ്ധതി വഴി ചേരുന്നവർ ബന്ധപ്പെട്ട സെക്രട്ടറിയുടെ കത്ത് ഹാജരാക്കണം. നാല്, ഏഴ് തുല്യതാ കോഴ്‌സുകൾക്ക് ഫീസില്ല. എസ്.ബി.ഐ ചലാൻ മുഖേനയാണ് ഫീസ് അടയ്ക്കേണ്ടത്.
പത്താം തരം പത്ത് മാസവും ഹയർസെക്കൻഡറി രണ്ട് വർഷവുമാണ് കോഴ്സ് കാലാവധി. പഠിതാക്കൾക്ക് പാഠപുസ്തകങ്ങളും അവധി ദിവസങ്ങളിലെ സമ്പർക്ക ക്ലാസുകളും ലഭ്യമാകും. വിശദവിവരങ്ങൾക്ക് മലപ്പുറം സിവിൽ സ്റ്റേഷനിലെ ജില്ലാ സാക്ഷരതാമിഷൻ ഓഫീസുമായോ ഗ്രാമപഞ്ചായത്ത്/നഗരസഭ പ്രേരക്മാരുമായോ ബന്ധപ്പെടണം. ഫോൺ: 0483 2734670, 7907918949, 9446630185, 9447537164.
Comments are closed.